ФК "Граніт" грамадзкаму актывісту Ігару Случаку: "Вы займаецеся нікому не патрэбнай справай"

Футбольны клуб "Гранiт" даслаў даволі дзіўны, на наш погляд, адказ, на ліст грамадскага актывіста з Гомеля Ігара Случака.

Нагадаем, Случак даўно вядомы актыўным прасоўваннем беларускай мовы, у тым ліку і на футбольным абшары Беларусі.

Ён ужо даволі працяглы час вядзе перапіску з беларускімі клубамі, накіроўваючы ў іх адрас лісты наступнага зместу:

Паважаныя сябры!

Дазвольце павіншаваць Вас з пачаткам 27-га Чэмпіяната Беларусі па футболе і пажадаць Вам толькі перамог і чэмпіёнства ў гэтым сезоне.

Футбол, гэта той спорт, што ў Беларусі прыцягвае найбольшую колькасць прыхільнікаў. Але акрамя гэтага, гэта і той спорт, што мае прамы ўплыў на фарміравання патрыятычнага складу характару, любові да Радзімы, Беларусі і родных мясцін. Гэта той спорт, што гуртуе народ.

Таму шаноўна прапануем Вам зрабіць у новым сезоне наступныя захады:

• Прозвішчы футбалістаў на іх спартыўнай форме пісаць па-беларуску;
• Гукавое і візуальнае суправаджэнне на стадыёне падчас правядзення матчаў праводзіць па-беларуску;
• Пасляматчавыя прэс-канферэнцыі праводзіць па-беларуску;
• У трэніровачным, арганізацыйным і паўсядзённым жыцці больш выкарыстоўваць беларускую мову і стымуляваць да гэтага іншых;
• У стасунках з прэсай выкарыстоўваць беларускую мову;
• Зрабіць беларускамоўную версію Вашага афіцыйнага сайта;
• Эмблему клуба выканаць па-беларуску;
• Старонкі ў сацыяльных сетках весці па-беларуску;
• Афішы і праграмкі да гульняў выконваць па-беларуску.

Гэтыя невялікія захады, дазволяць не толькі падвысіць патрыятызм сярод беларусаў, падвысіць выкарыстанне беларускай мовы, але і падвысіць цікавасць да чэмпіяната, а гэта ў сваю чаргу больш прададзеных квіткоў і рэкламы – прамая выгада для клуба.
Спадзяюся, гэтыя прапановы знойдуць водгук у Вашых мужных беларускіх сэрцах.
У адпаведнасці з Законам “Аб зваротах грамадзян і юрыдычных асоб” просім даць адказ пісьмова, у вызначаны законам час на вышэй пазначаны адрас.

Сёння на сваёй старонцы Facebook Случак апублікаваў адказ, які прыйшоў яму ад мікашэвіцкага "Граніту" за подпісам Старшыні Савета клуба Марыны Быстрай.

Перш чым прывесці увесь ліст, вось некалькi цытат з яго (арфаграфія арыгіналу захаваная):

"Вы займаецеся нікому не патрэбнай справай", "не трэба здавацца разумнейшым, чым вы ёсць на самай справе", "да разумнага чалавека вам яшчэ вельмi далёка", "у вашых лістах адлюстраванне чалавека, якi мае ўзровень - дзіцячы сад ясельная група".

Зрэшты, чытайце і ацэньвайце самі, а свае меркаваннi пiшыце у каментарах.
22254