"Забудова" можа стаць "Забудовай-ХХІ стагоддзе" ужо праз тыдзень

Маладзечанская футбольная каманда "Забудова" можа ператварыцца ў грамадскае аб’яднанне “Футбольны клуб "Забудова-ХХІ стагоддзе" ўжо на наступным тыдні, паведамляе "Рэгiянальная газета".

Дакументы на рэгістрацыю гэтай юрыдычнай асобы цяпер знаходзяцца ў галоўным упраўленні юстыцыі Мінаблвыканкама. Пра гэта паведаміў начальнік маладзечанскай каманды Пётр Кухальскі. Паводле яго слоў, гэтыя дакументы кіраўніцтва каманды зможа атрымаць на рукі на наступным тыдні.

Пытанне фінансавання дагэтуль застаецца адкрытым. Пётр Кухальскі расказаў, што ў яго ёсць падрыхтаваны каштарыс на наступны год, які начальнік каманды таксама пасля выхадных мае намер перадаць у фінансавы аддзел Маладзечанскага райвыканкама, адтуль – далей, на зацвярджэнне начальніка райвыканкама Фёдара Дамаценкі.

Пацвярджаюць свой намер паўдзельнічаць у фінансаванні маладзечанскай футбольнай каманды генеральны спонсар – чысцінскае адкрытае акцыянернае таварыства “Забудова”, а таксама спонсар – Маліноўшчынскі завод алкагольных вырабаў і мінеральнай вады “Аквадзіў”.

Начальнік каманды сказаў таксама, што цяпер вядуцца перагаворы і з іншымі спонсарамі, але пакуль у гэтым пытанні няма пэўнасці, называць іх заўчасна.

Тым часам каманда рыхтуецца да новага сезона. Па словах трэнера Віталя Казяка, футбалісты рэгулярна трэніруюцца. Але менавіта нявырашанае дагэтуль пытанне з фінансаваннем не дазваляе дамаўляцца з сапернікамі на правядзенне кантрольных спарынгавых матчаў. На жаль, сёння мы маем адсутнасць гульнявой практыкі.