Валявая перамога "Белшыны" і соты гол Блізнюка

Першую хатнюю гульню з-за непрыдатнасці свайго поля бабруйскай "Белшыне" прыйшлося правесці ў Жлобіне на штучным газоне. Але статус "нейтральнага" поля ніяк не паўплываў на гульню супернікаў. “Белшына” выглядала яўным фаварытам, а "Брэст" граў другім нумарам.

Стартавыя хвіліны засталіся цалкам за бабруйчанамі. Яшчэ стрэлка гадзінніка не перакрочыла адзнаку ў тры хвіліны, а “шыннікі” ледзь не забілі двойчы. На першай хвіліне украінскі легіянер Тарас Кабанаў пасля перадачы Лашанкова выйшаў сам на сам з галкіперам брэстчан Клімовічам, але прабіў крыху міма ад левай стойкі варот. Праз хвіліну ўжо іншы украінец “шыннікаў” Скепскi з 40! метраў моцна прабіў, але трапіў у папярэчыну.

Не забіваеш ты – заб’юць табе. Менавіта так і здарылася ў гэтай гульне. Бабруйскі запал у атацы падлавілі брэстчане. На чацвёртай хвіліне пасля контратакі Аляксандр Мацюкевіч абраў выгодную пазіцыю ў штрафной і дакладна прабіў па варотах.

“Белшына” ў хуткім часе вярнула стартавыя пазіцыі ў гульне. Праз дзве хвіліны бабруйчане зраўнялі лік. У зацяжной атаке Дзяніс Скепскі з вострага вугла прастрэліў уздоўж варот, дзе ў патрэбны момант апынуўся Генадзь Блізнюк, які паспяхова замкнуў перадачу.

Далей “Белшына” зноў захапіла ініцыятыву ў свае рукі. Бабруйчане большай часткай прабіваліся да штрафной пляцоўкі гасцей флангамі. Самымі актыўнымі на флангах былі абаронцы Шагойка і Быліна. Былы “бабруйчанін”, а зараз брэстчанін Юры Дручык займаўся персанальнай апекай Кабанава, і што варта адзначыць, – выканаў сваю місію.

У сярэдзіне тайма актыўны Сокал мог вывесці “Брэст” наперад, але ўдар галавой пасля навесу прыйшоўся міма рамкі. Пераломным момантам першага тайма магла стаць памылка Клімовіча, якая прывяла да прызначэння свабоднага ўдару. Дручык адпасаваў верхавой перадачай Клімовічу, пасля чаго галкіпер узяў мяч у рукі. Выканаць “сямімятровы” ўзяўся Блізнюк. Бабруйчанін прабіў нізам, але трапіў у ногі аднаму з гульцоў “Брэста”.
5169
Другі тайм зноў застаўся за гаспадарамі, але першымі зноў маглі адзначыцца госці. На 55-ай хвіліне пасля перадачы з правага фланга ў штрафной мяч атрымаў Хвашчынскі. Але ўдар Уладзіміра прыйшося ў штангу. Гэты “званочак” насцярожыў бабруйчан i яны з большым запалам пайшлі наперад.

Сімон Агар спыніў слаламны праход Блізнюка да штрафной пляцоўкі “Брэста”. Стандарт выканаў Скепскі, але мяч з дальняга ніжняга кута перавёў на вуглавы Клімовіч. У сярэдзіне тайма “Белшына” выйшла наперад. Зноў-такі Блізнюк дайшоў да штрафной і стрэлiў па варотах. Клімовіч адбіў мяч перад сабой нагамі. Максім Скавыш, які выйшаў за восемь хвілін дагэтуль, падабраў адскок і паразiў вароты.

“Брэст” спрабаваў неяк зраўняць лік, але большая частка атак сканчвалася безвыніковымі вуглавымі , ці ўдарамі ў “малако” з-за штрафной.

Тлустую кропку ў гульне паставіў усё той жа Блізнюк. У чарговай атацы на левым фланзе Дручык збіў Скавыша. Суддзя прызначыў штрафны удар у бок варот "Брэста". Скепскі з вострага кута круціў мяч у вароты. Самым спрытным у штрафной апынуўся Блізнюк і галавой скіраваў мяч у браму - 3:1. Тым самым Генадзь трапіў у спіс айчынных форвардаў, якія забілі па сто мячоў у чэмпіанаце Беларусі.

Статистика матча
Статистика "Белшины" - Статистика "Бреста"