"Белшына" - "Славiя". Доўгачаканая перамога Бабруйска

Бабруйскія футбольныя заўзятары нарэшце пабачылі першую перамогу "Белшыны" на хатнім стадыёне ў гэтым сезоне.

У першыя хвіліны гульні цяжка было прызвычаіцца да экіпіроўкі гульцоў. Бабруйчане, звыклыя бачыць сваiх ў чырвона-чорных футболках, сёння не раз блыталі каманду, за якую хварэюць: госці з Мазыру былі апранутыя ў ідэнтычныя футболкі ўзору мінулага сезона "Белшыны".

Стартавы адрэзак гульні застаўся за гаспадарамі. Ужо на першай хвіліне ў хуткай атацы Лашанкоў прастрэліў у штрафную, але ні Блізнюк, ні Скавыш так і не здолелі ўдала прабіць. Далей бабруйчане прыстрэльваліся да варот Савінскага з дальніх дыстанцыяў. Бліжэй да сярэдзіны тайма гульня супакоілася і змясцілася па большай частцы ў сярэдзіну поля. На 24-ай хвіліне лік у гульнi ледзь не адкрыў Раман Волкаў. Пасля навеса з вуглавога Раман трапіў у папярэчыну. Крыху пазней ужо Ірха прабіў з метраў дваццаці - Скіндарыс выратаваў. На 37-ай хвіліне трэнер бабруйчан вырашыў правесці замену. Замест Скепскага на поле выйшаў Гардзейчук. Яромка з заменай угадаў. Праз шэсць хвілін Міхаіл адкрыў лік у гульнi. Блізнюк абыграў на падыходзе да штрафной пляцоўкі абаронцу "Славіі" і мяч адскочыў да Гардзейчука. Бабруйчанін адразу дакладна трапіў у вароты.

У другім тайме мазыране больш валодалі ініцыятывай, але атакі гасцей не неслі вялікай пагрозы. Ірха і Чалядко турбавалі галкіпера ў асноўным ударамі здалёк. "Белшына" пайшла ў атаку толькі пасля 70-ай хвіліны i добрае ўзаемадзеянне Гардзейчука з Блізнюком прынесла "Белшыне" другі гол. Першы апынуўся на правым фланзе і прастрэліў ўздоўж варот, дзе Генадзь з пары метраў укалаціў мяч у сетку. Праз некалькі хвілін крыху не хапіла дакладнасці абаронцу "Белшыны" Аляксандру Шагойку. Капітан прайшоў з мячом ледзь не ад цэнтра поля і прабіў з вугла штрафной у крэставіну. Кропку ў гульнi паставіў нападаючы бабруйчан Тарас Кабанаў. Украінскі форвард, які дагэттуль яшчэ не адзначаўся за "Белшыну", эфектным ударам галавой пасля навеса Шагойкі забіў трэці мяч у вароты мазыран.